mathau o faethu

Does dim llinell amser benodol ar gyfer gofal maeth tymor byr. Yn y bôn, mae’n golygu bod y cynlluniau ar gyfer plentyn yn dal i gael eu hystyried. Felly, o ran y gofal rydych chi’n ei ddarparu, gallai fod am awr, am ddiwrnod, am fis neu am flwyddyn!

Fel gofalwr maeth tymor byr, rydych chi’n gweithio’n agos gyda ni wrth i ni sicrhau’r ‘tymor hir’ (sydd weithiau’n cael ei alw’n sefydlogrwydd). Mae hyn yn golygu eich bod chi yno am gyhyd ag sydd angen, gan gynnig cefnogaeth a chariad. Rydych chi hefyd yno pan fydd hi’n amser i helpu’r plentyn i symud ymlaen – at ei deulu, at deulu maeth arall neu i gael ei fabwysiadu. Chi yw’r bont i’r cam nesaf hollbwysig hwn.

Felly, dydy seibiant byr ddim yn golygu effaith fach. Yn aml, y mathau hyn o leoliadau yw’r cam cadarnhaol cyntaf mewn taith hirach – un sy’n wahanol i bob plentyn yn ein gofal, ac i bob gofalwr maeth hefyd.

Mae llawer o feddwl a gofal yn mynd i baru pawb, yn enwedig gyda gofal maeth tymor hir. Mae hyn oherwydd bod y math yma o ofal yn ymwneud â darparu sefydlogrwydd. Mae’n hanfodol ein bod yn dod o hyd i’r teulu maeth cywir ar gyfer pob un plentyn – ac mae angen rhywbeth unigryw ar bob un ohonyn nhw.

Dyna lle gallwch chi helpu. Fel gofalwr maeth tymor hir, rydych chi’n darparu amgylchedd saff a lle diogel. I blentyn, mae’n golygu teulu maeth sefydlog am oes.

Weithiau, gall hoe fach wneud popeth yn haws. Dyna beth mae seibiant byr yn ei gynnig – amser i ffwrdd, er mwyn i blant a’u teuluoedd ddod atyn nhw’u hunain.

Mae seibiant byr (sydd weithiau’n cael ei alw’n ‘ofal cymorth’) yn aml yn cael ei drefnu ymlaen llaw a gall ddigwydd yn rheolaidd hefyd.

Yr hyn sy’n dda am seibiant byr yw’r cyfle y mae’r plant yn ei gael i brofi pethau newydd a lleoedd newydd, a chreu cysylltiadau ystyrlon newydd. Fel gofalwr seibiant byr, rydych chi’n dod yn rhan o deulu estynedig y plentyn ac yn cydweithio fel un uned fawr gefnogol, er lles y plentyn.

Efallai na fydd rhai rhieni’n barod i wynebu’r byd ar eu pen eu hunain, a dyna lle gall maethu rhiant a phlentyn helpu.

Gyda lleoliadau rhiant a phlentyn, rydych chi’n camu i mewn i gynnig profiad gwerthfawr – profiad magu plant a phrofiad bywyd yn gyffredinol. Rydych chi’n rhannu eich doethineb ac yn cynnig cefnogaeth, er mwyn i’r rhieni hyn allu gwneud yr un fath ymhen amser. Mae’n ymwneud â’u helpu i fagu hyder a datblygu sgiliau ar gyfer y dyfodol.

Mae gennyn ni rai plant yn ein gofal sydd ag anghenion emosiynol neu ymddygiadol mwy cymhleth. Gall hyn olygu bod angen math gwahanol o ofal arnyn nhw, a dyna lle mae lleoliadau therapiwtig yn helpu.

Mae cefnogaeth ychwanegol a hyfforddiant arbenigol ar gael ar gyfer gofalwyr therapiwtig, er mwyn eu helpu i ddiwallu anghenion unigol pob plentyn yn eu gofal.

Mae ffoaduriaid ifanc yn cyrraedd y DU ar eu pen eu hunain neu wedi’u gwahanu oddi wrth eu teulu yn ystod y daith – yn chwilio am ddiogelwch a dechrau newydd. Mae mwy na 100 o’r ffoaduriaid ifanc hyn yn cyrraedd Cymru bob blwyddyn.

Rydyn ni’n falch o fyw mewn gwlad gynhwysol ac amrywiol sy’n gofalu am bob plentyn yng Nghymru. Rydym angen teuluoedd yn RhCT a all gynnig cymorth, sefydlogrwydd ac arweiniad i ffoaduriaid ifanc wrth iddynt ailddarganfod eu hannibyniaeth mewn gwlad newydd.

Os gallwch chi eu cefnogi nhw, gallwn ni eich cefnogi chi.

Beth bynnag yw eich cefndir a’ch sefyllfa gartref, os oes gennych rywbeth i’w gynnig i ffoadur ifanc neu os hoffech gael rhagor o wybodaeth, siaradwch â ni yma.